حالة هذا الأسبوع ( 383 )

تالا محمود علي .. سنتين و 8 شهور .. من الوادي الجديد

" الحول الوحشي المتقطع "

حول متقطع يعني مش دائم .. يعني ساعات العين تبقى حادفة لبره كده زي صورة تالا قبل العملية .. وساعات لأ .. وصحيح ان العين نظرها مش بيضعف أبداً من الحول المتقطع لأن كل شوية العين بتتعدل وتبص طبيعي .. إلا ان كل الأهالي بيعملوا لولادهم العملية عشان الحول ده ميظهرش أبداً .. لأن ظهور الحول عند الأطفال دول بيأثر جداً على نفسيتهم

مامة تالا من بعيد أوي .. من الوادي الجديد .. بعتت لي صور بنتها على الواتس .. وشرحت لي حالتها بالتفصيل .. قلت لها يا ماما الحول ده علاجه عملية .. ملهوش علاج تاني

المهم .. تالا جت لي العيادة .. حددت درجة الحول وعملت لها العملية تاني يوم .. وسافرت الوادي الجديد بعد العملية على طول

بعد شهر من العملية مامتها بعتت لي الصورة دي وهي فرحانة جداً .. المرضى بتوعي اللي ساكنين بعيد اتعودوا على كده .. اتعودوا يعملوا استشارة معايا بالواتساب .. لما شفت صورتها فرحت جداً بيها .. نتيجة عمليتها فعلاً حلوة جداً

ألف حمد الله على سلامتك يا حبيبتي .. وألف مبروك