حالة هذا الأسبوع ( 398 )

إيمان مشالي .. 13 سنة .. من البحر الأحمر

" الحول الوحشي المتقطع "

حول متقطع يعني مش دائم .. يعني ساعات العين تبقى حادفة لبره كده زي صورة إيمان قبل العملية .. وساعات لأ .. وصحيح ان العين نظرها مش بيضعف أبداً من الحول المتقطع لأن كل شوية العين بتتعدل وتبص طبيعي .. إلا ان كل الآباء بيعملوا لولادهم العملية عشان الحول ده ميظهرش أبداً .. لأن ظهور الحول عند الأطفال دول بيأثر جداً على نفسيتهم

إيمان من بعيد أوي .. من البحر الأحمر.. مامتها بعتت لي صورتها على الواتس .. وشرحت لي حالتها بالتفصيل .. رديت قلت لها يا ماما الحول ده علاجه عملية .. ملهوش علاج تاني

المهم .. إيمان جت لي العيادة .. حددت درجة الحول وعملت لها العملية تاني يوم .. وسافرت البحر الأحمر بعد العملية على طول

إيمان جت لي النهاردة استشارة ..  الحمد لله عمليتها هايلة .. شكلها بقى جميل جداً ..  ابتسامتها في الصورة بتبين قد ايه هي فرحانة بشكلها الجديد الجميل

تصوروا انا اكتشفت ان إيمان فنانة موهوبة .. ومحترفة كمان .. بترسم لوحات رائعة بالخرز.. جابت لي هدية .. لوحة رائعة مكتوب عليها آية قرآنية 

شكراً يا إيمان وحمد الله على سلامتك .. وشكراً كمان مرة انك طلبتي انزل صورتك على صفحتي  في حالة هذا الاسبوع ..

ألف حمد الله على سلامتك يا حبيبتي .. وألف مبروك