حالة هذا الأسبوع ( 407 )

حور احمد اسماعيل .. 4 سنين .. من بلبيس .. الشرقية

" الحول الوحشي المتقطع "

حول متقطع يعني مش دائم .. يعني ساعات العين تبقى حادفة لبره كده وساعات ما يكونش فيه حول خالص .. والعين نظرها مش بيضعف أبداً من الحول المتقطع لأن كل شوية العين بتتعدل وتبص طبيعي .. عشان كده نظرها مش بيضعف .. ورغم اني فعلاً بأقول للأمهات ان الحول المتقطع ملوش أضرار على النظر إلا ان مفيش أم بتوافق أبداً انها تسيب بنتها تحول كده ودايماً يطلبوا مني انهم يعملوا عملية عشان الحول ده ما يظهرش تاني ومفيش حد يتنمر على بنتهم

حور كانت عندي من شهر في العيادة .. مامتها جت لي من بلبيس عايزه تشوف علاج للحول ده عشان ميظهرش كل شوية .. بنتها كبرت خلاص .. ابتدت تاخد بالها من كلام الناس عليها .. الموضوع مأثر فيها جداً ..  احنا عارفين طبعاً  ان الحول الوحشي المتقطع علاجه عمليه .. ملهوش علاج تاني .. لا نضارة ولا غيره .. مفيش حل إلا العملية

المهم .. عملت العملية لحور تاني يوم .. بعد شهر من العملية جت مع مامتها النهارده عشان اشوفها .. الحمد لله رب العالمين .. عمليتها حلوه أوي .. حمد الله على سلامتك يا بنتي .. وألف مبروك نجاح عمليتك