حالة هذا الاسبوع ( 69 ) سما محمد العجمي .. سنتين .. من زفتى .. الغربية

" العيون الراقصة والنقطة الجميلة "

حالة النهاردة عن مرض الرأرأة .. مرض غريب قوي يارب اعرف اشرحه لكم

الرأرأة ياجماعة يعني اهتزاز العينين أو ساعات نسميه " العيون الراقصة " .. بنلاقي الاطفال دول عينيهم على طول بتتهز زي رقاص الساعة كده .. على طول العين راحة جاية يمين شمال .. مش بتقف أبداً ..

ساعات بيكون سبب الرأرأة أي مرض خلقي بيضعف النظر .. مثلاً بيكون الطفل مولود عنده مية بيضا .. مثلاً بيكون الطفل مولود عنده مرض في الشبكية .. المهم الطفل ياعيني بيكون مش شايف كويس وعينيه بتكون رايحة جاية بتدور على الصورة ..

وساعات تانية بنلاقي الطفل اللي عينيه بترقص بيشوف عادي وعينيه بتتهز برضه .. زي حالة النهاردة كده .. سما عينيها فيها رأرأة .. لما فحصت قاع العين لقيتها معندهاش حاجة .. نظرها كويس يعني .. دي بنسميها الرأرأة الخلقية .. يعني من غير سبب ..

في الرأرأة مخ الطفل أحياناً بيكتشف اكتشاف مذهل .. بيكتشف ان فيه حتة معينة لما العين تبصلها الرأرأة بتقل جداً .. الحتة دي المخ بيحبها جداً ودايماً عايز يخلي العين تبص ناحيتها .. احنا بنسمي الحتة دي " النقطة الجميلة " لأن العين لما تبص ناحيتها مش بتتهز تقريباً

للأسف الشديد ياجماعة .. ساعات كتير بتكون النقطة الجميلة دي مش قدام .. بتكون في الجنب .. نلاقي الطفل عايز يبص للجنب على طول .. حتى لو عايز يبص قدامه نلاقيه يعوج رقبته عشان يبص بالجنب برضه .. زي سما كده قبل العملية

طيب احنا بنعمل ايه في عملية الولاد دول .. الهدف من العملية اننا نجيب النقطة الجميلة دي اللي المخ بيحبها .. نجيبها قدام العين عشان الطفل يبص قدامه عادي من غير ما يعوج رقبته .. عملية صعبة وقياستها معقدة جداً وبتتعمل في كل العضلات الأفقية في العينين .. مش مسموح بالغلط فيها .. أي غلط معناه ان المخ هيدور على نقطة جميلة تانية غير اللي احنا عملناها .. والطفل بعد العملية والتعب ده كله برضه مش هيبص لقدام .. يبقى كأنك يا أبو زيد ماغزيت .. بس الحمد لله .. عملية سما نتيجتها هايلة .. الحمد لله على توفيق ربنا في العملية دي .. البنت أخيراً بقت بتبص لقدام عادي زي بقية الاطفال .. النهاردة شفتها بعد العملية .. أول مامتها ما فتحت باب العيادة ولقيت القمر ده باصص لي عادي كده .. الفرحة ما سعتنيش .. الحمد لله رب العالمين .. حمد الله على سلامتك يابنتي

د. جمــال صبحي