حالة هذا الأسبوع ( 188 ) احمد حسين موسى .. 41 سنة .. من البحيرة

" أن تأتي متأخراً خيرٌ من ألا تأتي أبداً "

يومياً ياجماعه افتح رسايل الصفحة ألاقي السؤال ده  :

·       انا عندي 58 سنة .. عندي حول .. ينفع اعمل عملية ؟

·       أنا عندي 40 سنة ينفع أعمل عملية الحول في السن دي ؟

·       أنا عندي 35 سنة وعايز أعمل عملية الحول .. تنفع ولا لأ ؟

طيب الأول أحب اقول لكم ان مفيش حاجه إسمها مينفعش تعمل عملية الحول .. مفيش حاجه اسمها مينفعش .. مهما كان عمرك .. وكلمة مهما كان عمرك دي ملهاش حدود .. اربعين .. خمسين .. ستين سنة .. برضه ينفع طبعاً تعمل العملية وتعدل الحول

صحيح انا دايماً اكرر في كلامي ان الحول لازم يتعدل في سن صغيره .. وان احنا بنعمل عمليات حول بمنتهى الأمان لبيبيهات عمرها 4 شهور .. وان الواحد ما يسيبش الحول لحد أما يكبر لأن العين الحوله بتضعف ولازم نعدل الحول قبل النظر ما يضعف .. الى آخر الكلام اللي با اكتبه كل يوم على صفحتي وكلكم خلاص حفظتوه

لكن برضه ياجماعه .. لو واحد عاش أحول طول عمره .. وبعدين فكر في أي وقت انه يعمل عملية عشان يعدل الحول .. يعدل الحول شكلاً بس .. حتى لو النظر مش هيتحسن .. ينفع ولا .. لأ ؟

طبعاً ينفع .. مفيش أي مشكلة .. انا كل يوم باعمل عمليات حول لعيانين كبار في السن وانا والعيان بنكون عارفين ان العين الحوله هيفضل نظرها زي ما هو حتى بعد ما نعدل الحول .. 

ودايماً باقول للعيان .. حتى لو العين الحوله نظرها مش هيتحسن .. طيب اضعف الايمان نعدل الحول ويبقى شكلك عادي وطبيعي .. ليه ترضى تعيش كده .. ليه تعيش محرج كده

انا خلال مشواري الطويل في التخصص ده ..  عملت عمليات حول لعيانين وعيانات عمرهم فوق الستين سنة .. والمفاجأة بقى ان انا مش قادر اوصف لكم الفرحة والسعادة اللي كانت عندهم بعد العملية بعد الحول ما اتعدل .. ضحكة جميلة داخلين بيها العيادة بعد العملية .. ضحكة ملهاش مثيل تشوفها على وشهم لما يبصوا في المرايا لأول مرة بعد العمر ده ويلاقوا شكلهم طبيعي من غير حول .. حاجة تفرح فعلاً .. نيولوك بجد

عم أحمد الراجل الطيب ده شغال طباخ في فندق كبير في المدينة المنورة .. من شهر كده جالي في الأجازه بتاعته هو وزوجته .. ست طيبة جداً زيه بالظبط .. عم أحمد قالي أنه متابع صفحتي على الفيس من سنين .. قرأ كل الكلام اللي باكتبه عن الحول .. وأخيراً قرر أنه يعمل عندي العملية في أول أجازة ينزل مصر .. النهاردة عم أحمد جالي استشارة بعد العملية بأسبوع .. طبعاً حاجة تانية خالص تخليني أصر على رأيي .. لأ ياجماعه .. محدش يوافق يكمل حياته أحول .. مهما كان عمرك .. إوعى توافق تكمل كده .. شوف عم أحمد .. شوف شكله قبل العملية وشكله بعد العملية .. ولسه لما عينه الحمرا دي تروق وتفتح عادي زي العين التانيه بعد كام يوم كده .. هيبقى غير .. 

عم أحمد قالي بالحرف الواحد صحيح القرار كان متأخر بس مش مهم .. المهم إني اتشجعت وأخدت القرار

برافو والله يا عم أحمد .. بالظبط زي المثل ما بيقول :

" أن تأتي متأخراً خيرٌ من ألا تأتي أبداً "

وأخيراً ألف شكر يا عم أحمد إنك وافقت أنزل صورتك على صفحتي

حمد الله على سلامتك يافندم والف الف مبروك

د. جمــال صبـــحي