حالة هذا الأسبوع ( 277 ) الحاجة سماح .. 42 سنة

" الحول الوحشي للعين الضعيفة "

يومياً افتح رسايل الصفحة ألاقي السؤال ده بيتكرر يومياً

" انا عندي أربعين سنة .. وانا عندي 50 سنة .. وانا عندي 60 سنة .. ينفع اعمل عملية الحول ؟ "

طيب أحب اقول الأول ان مفيش حاجة تمنع اي انسان انه يعمل عملية الحول مهما كان عمره .. اربعين .. خمسين .. ستين .. برضه ينفع يعمل العملية ويعدل الحول

صحيح انا دايماً أقول ان الحول لازم يتعدل في سن صغيرة لأن العين الحوله هتضعف ولازم نعدل الحول قبل النظر ما يضعف .. لكن برضه ياجماعة .. لو واحد عاش كده طول عمره .. وبعدين فكر انه يعمل عملية عشان يعدل الحول .. يعدل الحول شكلاً بس .. حتى لو النظر مش هيتحسن .. ينفع ولا لأ ؟

طبعاً ينفع .. مفيش أي مشكلة .. انا كل يوم باعمل عمليات حول لعيانين كبار وانا عارف ان العين الحوله هيفضل نظرها زي ما هو حتى بعد ما نعدل الحول 

ودايماً اقول لهم .. حتى لو العين الحوله نظرها مش هيتحسن .. طيب اضعف الايمان نعدل الحول ويبقى شكلك عادي وطبيعي      

والمفاجأة بقى ان انا مش قادر اوصف لكم الفرحة والسعادة اللي باشوفها على وشهم بعد الحول ما اتعدل .. ضحكة جميلة داخلين بيها العيادة بعد العملية .. ضحكة ملهاش مثيل .. حاجة تفرح فعلاً .. نيولوك بجد .. زي الحاجة سماح كده .. ضحكتها باينة حتى من ورا الماسك