حالة هذا الأسبوع ( 380 )

عبد المقصود الشافعي .. 51 سنة .. من أسيوط

" أن تأتي متأخراً خيرٌ من ألا تأتي أبداً "

يومياً ياجماعه افتح رسايل الصفحة ألاقي السؤال ده  :

انا عمري ( .. )  سنة .. ينفع اعمل عملية حول في السن دي ؟

أحب اقول لكم الأول ان مفيش حاجه إسمها مينفعش تعمل عملية حول .. مهما كان عمرك .. اربعين .. خمسين .. ستين .. برضه ينفع تعمل العملية

صحيح انا دايماً اقول ان الحول لازم يتعدل في سن صغيره قبل العين متضعف الى آخر الكلام اللي با اكتبه كل يوم على صفحتي وكلكم خلاص حفظتوه

لكن برضه ياجماعه .. لو حد عاش كده طول عمره .. وبعدين فكر في أي وقت انه يعمل عملية عشان يعدل الحول .. حتى لو النظر مش هيتحسن .. ينفع ولا لأ ؟  طبعاً ينفع .. مفيش أي مشكلة .. انا كل يوم باعمل عمليات حول لناس كبار في السن وانا وهما بنكون عارفين ان العين الحوله هيفضل نظرها زي ما هو حتى بعد ما نعدل الحول

عبد المقصود الراجل الطيب اللي في الصورة ده .. جاني من أسيوط من شهر كده .. راجل صعيدي طيب جداً ودمه زي السكر .. قال لي أنه متابع صفحتي على الفيس من سنين .. بيقرأ كل الكلام اللي باكتبه عن الحول .. وأخيراً قرر أنه يعمل عندي العملية .. النهاردة عبد المقصود  جه لي استشارة بعد العملية بأسبوع .. طبعاً حاجة تانية خالص تخليني أصر على رأيي .. لأ ياجماعه .. محدش يوافق يكمل حياته أحول .. مهما كان عمرك .. إوعى توافق تكمل كده .. شوف عبد المقصود  .. شوف شكله قبل العملية وشكله بعد العملية .. عبد المقصود  قال لي بالحرف الواحد صحيح القرار كان متأخر بس مش مهم .. المهم إني اتشجعت وأخدت القرار أخيراً

برافو والله يا عبد المقصود .. وألف مبروك نجاح عمليتك