حالة هذا الأسبوع ( 404 )

الحاج احمد .. 58 سنة

" الحول عند الكبار "

كل يوم افتح رسايل الصفحة ألاقي السؤال ده بيتكرر يومياً

" عندي سؤال يا دكتور جمال .... انا عندي ستين سنة ..  ينفع اعمل العملية ؟ "

طيب أحب اقول الأول ان مفيش من الناحية الطبية حاجة تقول ان مينفعش انسان مهما كان عمره انه يعمل عملية عشان يعدل الحول .. وكلمة " مهما كان عمره " دي ملهاش حدود .. اربعين .. خمسين .. ستين .. برضه ينفع يعمل العملية ويعدل الحول

صحيح انا دايماً اكرر في كلامي ان الحول لازم يتعدل في سن صغيرة .. وان الواحد ما يسيبش الحول لحد أما يكبر لأن العين الحوله بتضعف ولازم نعدل الحول قبل النظر ما يضعف .. الخ الكلام اللي با اكتبه كل يوم وعارف ان انتم كلكم خلاص حفظتوه

لكن برضه ياجماعة .. لو واحد عاش كده طول عمره .. وبعدين فكر انه يعمل عملية عشان يعدل الحول .. يعدل الحول شكلاً بس .. حتى لو النظر مش هيتحسن .. ينفع ولا .. لأ ؟

طبعاً ينفع .. مفيش أي مشكلة .. انا كل يوم باعمل عمليات حول لعيانين كبار في السن وانا عارف ان العين الحوله هيفضل نظرها زي ما هو حتى بعد ما نعدل الحول .. 

ودايماً باقول للعيان .. وحتى لو العين الحوله الضعيفة نظرها مش هيتحسن .. طيب اضعف الايمان نعدل الحول ويبقى شكلك عادي وطبيعي .. ليه ترضى تعيش وحاسس انك ناقصك حاجة .. أو ان حد يبص لك بطريقة مش هي.       

انا خلال مشواري الطويل في التخصص ده ..  عملت عمليات كتير لمرضى فوق الستين .. والمفاجأة بقى ان انا مش قادر اوصف لكم الفرحة والسعادة اللي كانت عندهم بعد العملية بعد الحول ما اتعدل .. ضحكة جميلة داخلين بيها العيادة بعد العملية .. ضحكة ملهاش مثيل تشوفها على وشهم لما يبصوا في المرايا لأول مرة بعد العمر ده ويلاقوا شكلهم طبيعي من غير حول .. حاجة تفرح فعلاً .. نيولوك بجد