حالة هذا الأسبوع ( 106 ) هويدا عبد العظيم .. 49 سنة .. من القاهرة

" الحول عند الكبار "

السؤال ده يا جماعة .. اكتر سؤال العيانين بيسألوه كل يوم

" انا عندي 30 سنة .. ينفع أعمل العملية ؟ "

" انا عندي 40 سنة .. ينفع أعمل العملية ؟ "

" انا عندي 50 سنة .. ينفع أعمل العملية ؟ "

" انا عندي 60 سنة .. ينفع أعمل العملية ؟ "

" هي العملية دي تنفع للكبار ولا للأطفال بس ؟ "

انا كتبت الكلام ده عشرات المرات هنا على صفحتي .. عملية الحول بتتعمل في أي سن .. أربعين .. خمسين .. ستين .. مفيش سن اسمه مينفعش يعمل عملية .. من أول البيبي اللي عنده 4 شهور لغاية المريض اللي عنده 60 سنه وأكبر كمان .. عملية الحول بتتعمل للأطفال والكبار .. مفيش حاجة اسمها انا كبرت خلاص ومينفعش اعمل العمليه

المهم .. من اسبوع كده دخل عندي العياده شاب في العشرينات ومعاه مامته مدام هويدا  واضح ان عندها حول أنسي .. هويدا ست مصرية لطيفة جداً .. في منتهى خفة الدم وسرعة البديهة .. طلعت الموبايل بتاعها .. عاملة سكرين شوت لكل صور الستات اللي انا عملت لهم عملية ونشرتها على صفحتي في حالة هذا الاسبوع

قالت لي ان الحول ده عندها من وهي طفلة .. عمري ما فكرت اني اعمل العملية  .. وبعدين قلت لنفسي خلاص انا كبرت مينفعش اعمل العمليه .. لحد ما شفت صفحتك على الفيس وصور الستات اللي في سني وأكبر مني كمان .. عملوا العملية وعينهم اتعدلت .. اتشجعت وقلت لازم اعمل العمليه ..

تاني يوم الصبح عملت العملية لمدام هويدا.. والنهاردة بعد اسبوع ميعاد استشارتها بعد العملية .. انا فرحان قوي بالحالة دي .. سعادتي وهويدا داخله عندي العيادة بالنيولوك الجديد مش قادر أوصفها ..  ضحكة ايه .. وثقة ايه .. وفرحة ايه .. وأناقة ايه .. حاجه تانيه خالص .. نيولوك فعلاً .. هويدا صحيح جت متأخرة شويه .. بس المهم انها جت

انا دايماً بأقول

" أن تأتي متأخراً .. خير من ألا تأتي أبداً "

حمد الله على سلامتك يا هويدا وألف مبروك

لمشاهدة حالات الحول الأخرى قبل وبعد العملية

اضغط هنا وادخل صفحة " حالة هذا الأسبوع "

http://www.hawal-eg.com

د. جمــال صبـــحي