حالة هذا الأسبوع ( 354 )

 دينا .. 23 سنة .. من المنيا

" الحول الأنسي المرتجع "

 دينا بعتت لي الرسالة دي على الواتس :

" ازي حضرتك يا دكتور جمال .. انا دينا من المنيا .. يارب تكون فاكرني ..  أنا عملت العملية عندك وأنا في أولى ثانوي – من 7 سنين تقريباً – كانت النتيجة حلوه والحول راح ومفيش أي حاجه خالص لحد مخلصت الجامعة السنه اللي فاتت واتخرجت وعينيا زي الفل .. من سنة كده لاحظت ان الحول بدأ يرجع تاني شويه بشويه .. أنا عايشه في عذاب ونفسيتي بقت تحت الصفر .. مش عارفه أعمل ايه .. خايفه أعمل العمليه تاني وبعد كام سنه الحول يرجع تاني .. وبرضه مش قادره أعيش كده .. أعمل ايه ؟ "

رديت على دينا بالرساله دي :

" مينفعش يا دينا بنت في سنك لسه متخرجه والدنيا كلها قدامها ترضى انها تكمل حياتها كده .. مفيش أي مبرر لكده يا بنتي .. حتى لو كنتي عملت عملية من 7 سنين والحول رجع تاني .. برضه ده مش مبرر أبداً انك ترضى تكملي حياتك كده .. ايه المشكلة يا دينا انك عملتي عملية والحول رجع .. طيب ما نعمل عملية تاني وان شاء الله ميرجعش تاني .. المهم دلوقتي الحول ده لازم يتعدل .. ومش معنى انك عملتي عمليه والحول رجع تاني بعد 7 سنين انك لو عملتي عمليه تاني فالحول لازم هيرجع تاني في المستقبل .. ده كلام غلط خالص ومش صح ومخالف لكل الحقائق الطبيه .. وان شاء الله الحول مش هيرجع تاني أبداً "   

دينا كانت بسبع رجاله .. سمعت كلامي .. لم تستسلم زي كتير من المرضى اللي رفعوا الرايه البيضا بعد اول تجربه فاشله وكملوا حياتهم محبطين ومكسوفين ويائسين ومعقدين .. دينا لم تستسلم  .. قالت لأ .. مش ممكن أكمل حياتي كده .. لازم الحول ده يتعدل

وفعلاً عملت لدينا العمليه من اسبوعين

النهارده دينا جت لي من المنيا بعد العملية استشاره .. الحمد لله رب العالمين .. فرحتي بيها مش قادر أوصفها لكم .. مفيش حول خلاص .. بنت هايله والله .. واثقة .. أنيقة .. جميلة .. مقدرش غير إني اقول الحمد لله رب العالمين .. وألف حمد الله على سلامتك يا بطله .. وان شاء الله ميرجعش الحول تاني أبداً