حالة هذا الأسبوع ( 484 )

مكة احمد ماهر .. 8 سنوات .. من كفر الشيخ

" هو بعد العملية الحول بيرجع تاني ؟؟ "

بمناسبة حالة مكة اللي عملت لها العملية من 7 سنين .. كان ساعتها عندها سنة .. ونزلتها على صفحتي الحالة رقم  251 .. مكة جات لي النهاده العيادة .. بنت زي القمر .. مكة فكرتني بأشهر سؤال بتسأله المرضى على وسائل التواصل .. هو بعد العملية يا دكتور جمال الحول بيرجع تاني ؟؟ .. مكة قدامكم أهي أكبر دليل

فيه وهم شائع يا جماعة عند عيانين الحول بيخليهم ميعملوش العمليه ويفضلوا طول عمرهم عايشين بالحول ده .. الناس بتقول لهم متعملوش العملية .. اي حد بيعمل عملية الحول .. بعد شوية الحول بيرجع له تاني

الكلام ده طبعا مش صح .. ده كلام غلط خالص ومخالف لكل الحقائق الطبيه المعروفة .. نسبة رجوع الحول بعد العملية ١٠% بس .. ومش في كل أنواع الحول كمان .. فيه أنواع كتيره من الحول مش بترجع ابدا .. يعني نسبة رجوع الحول فيها صفر % .. وحتى الأنواع دي اللي نسبة الرجوع فيها ١٠% .. دي نسبة قليلة أوي .. يعني كل ١٠ عيانين بيعملوا العملية تسعة منهم مش بيرجع لهم الحول ابدا.. وعيان واحد بس من العشرة بيرجع له الحول بعد سنه سنتين تلاته اربعه .. المهم العيان ده لما بيرجع له الحول بنعمل له عمليه تاني والحول بيتعدل برضه .. يعني مش مصيبة ان الحول يرجع .. خالص .. الموضوع بسيط جدا .. بنشد العضله كمان شوية والحول بيتعدل ويكمل حياته زي الفل

شكراً يأبو مكة إنك وافقت أنزل صورتها على صفحتي