حالة هذا الأسبوع ( 486 )

" الحول الأنسي المرتجع "

يوسف نصحي .. 18 سنة .. من أسيوط

" دكتور جمال : أنا عملت عملية حول وأنا صغير والحول رجع تاني .. ينفع أعمل عملية تاني ؟؟ "

السؤال ده بيجيلي كتير قوي في رسايل الصفحة

مش عارف ليه الناس فاكره إن اللي عمل عملية حول والحول رجع له تاني .. يبقى خلاص مفيش فايده .. مينفعش يعمل عملية تاني .. يرضى بنصيبه ويعيش كده

طبعاً غلط .. أكبر غلط .. مفيش أصلاً حاجة اسمها مينفعش نعمل عملية .. مهما كان السبب .. أي حول ياجماعة ممكن يتعدل بالعملية .. سواء عملت عمليات قبل كده .. سواء معملتش

يوسف .. الشاب الأسمر الجميل المؤدب ده جالي النهارده من أسيوط

" أنا رحت لدكاترة كتير وقالوا لي " اوعى تعمل عملية .. مادام عملتها قبل كده ورجع .. يبقى الحول لازم هيرجع تاني .. صح الكلام ده يا دكتور جمال ؟ "

لأ طبعاً .. مش صح

" بس انا خايف اعملها ويرجع تاني "

" على أسوأ الفروض يا يوسف .. الحول هيرجع بعد 15 سنة كمان .. طيب يا راجل عايز تقعد أحول كده طول عمرك عشان خايف ان الحول يمكن يرجع تاني بعد 15 سنة .. منطق غريب جداً والله "

يوسف بعد كلامي ده اتشجع جداً ..

المهم .. عملت له العملية تاني يوم  .. وسافر بعد العملية على طول

يوسف جالي النهارده بعد العملية بأسبوعين .. الحمد لله .. عمليته حلوة قوي .. يارب تفضل كده على طول والحول ما يرجعش تاني أبداً

حمد الله على السلامة يا ابني .. والف مبروك