حالة هذا الأسبوع ( 247 ) عبد العزيز ياسين .. 33 سنه .. من دمنهور

" أنا عملت العملية والحول رجع .. ينفع اعمل عملية تاني ؟ "

احب أولاً اشكر عبد العزيز على ثقته بنفسه اللي ملهاش حدود وطلبه اني انزل صورته على صفحتي مع انه صاحب محل موبيلات معروف واصحابه كلهم هيشوفوا البوست ده لكن هو حابب انه يشارك الناس قصته

لما عيان يكون عمل عملية والحول رجع له تاني  بيكون مش مصدق أبداً انه ممكن يعمل عملية تاني وان ممكن الحول يتعدل وميرجعش تاني .. عبد العزيز عمل عملية حول من 5 سنين لكن الحول رجع تاني زي الأول بالظبط .. كان متابع حالاتي على الصفحه  .. انا دايماً باكتب ان مينفعش شاب في سن عبد العزيز يرضى انه يعيش طول حياته أحول .. مفيش أي مبرر لكده .. حتى لو عمل عملية قبل كده والحول رجع تاني .. ده برضه مش مبرر انه يرضى يعيش كده .. لازم يعمل عمليه تاني .. ولازم عينه تتعدل

سؤاله كان محدد وواضح " د. جمال انت دايماً بتكتب على صفحتك ان أي حول حتى لو اتعمل قبل كده ممكن يتعدل تاني .. صح ؟ "

" صح يا عبد العزيز انا باكتب كده .. مفيش حاجة اسمها الدكاترة قالوا لي مينفعش تعمل عملية تاني .. الكلام ده كله غلط والدكاترة مش بتقول كده .. أي حول فعلاً ممكن يتعدل بالعملية "

الحمد لله رب العالمين