حالة هذا الأسبوع ( 365 )

نيرمين حلمي .. 35 سنه .. من القاهرة

" الحول الوحشي المرتجع "

احب أولاً اشكر نيرمين على ثقتها بنفسها اللي ملهاش حدود عشان وافقت انزل صورتها على صفحتي بالرغم اني عرفت ان صاحباتها على الفيس كتير قوي وكلهم هيشوفوا صورها دي لكن نيرمين طلعت بنت شجاعه وجدعه جداً .. وحبت ان البنات اللي عندهم نفس مشكلتها تشاركهم التجربة الناجحه دي اللي مرت بيها

لما بنت زي نيرمين يا جماعه تكون عملت 3 عمليات حول قبل كده والحول كل مرة يرجع .. بتكون مش مصدقه كلامي وانها ممكن تعمل عملية لرابع مرة وان الحول هيتعدل ومش هيرجع تاني أبداً .. نيرمين كانت متابعه حالاتي على الصفحه  .. انا دايماً باكتب ان مينفعش شابه في سن نيرمين ترضى انها تعيش طول حياتها بالحول ده .. مفيش أي مبرر لكده .. حتى لو عملت عمليات قبل كده والحول رجع تاني .. ده برضه مش مبرر انها ترضى تعيش كده .. لازم تتشجع وتعمل عمليه تاني .. لازم عينها تتعدل .. مينفعش تكمل حياتها كده

لما جت العياده سؤالها ليا كان محدد وواضح " د. جمال انت دايماً بتكتب على صفحتك ان أي حول حتى لو اتعمل قبل كده كذا مرة ممكن يتعدل برضه .. صح ؟ "

" صح يا نيرمين انا باكتب دايماً كده .. مفيش حاجة اسمها بيقولوا لي مينفعش تعملي عملية تاني .. الكلام ده كله غلط .. أي حول فعلاً ممكن يتعدل بالعملية .. حتى لو عملتيه قبل كده كذا مرة "

المهم .. عملت العملية تاني يوم .. ولما نيرمين جت لي استشارة بعد اسبوعين .. اتفاجأت بواحده تانيه خالص .. بقيت متمسك برأيي أكتر وأكتر .. شوفوا شكل نيرمين بقى عامل ازاي .. شوفوا شكلها الروعة .. بنت زي القمر كده كانت توافق ازاي تكمل حياتها بالحول اللي كان عندها .. برافو عليكي يا بنتي وعلى شجاعتك وتصميمك إنك تعملي عمليه لرابع مره وتمسكك بالأمل برغم كل اللي حصل  

الحمد لله رب العالمين وألف مبروك نجاح عمليتك