حالة هذا الأسبوع ( 400 )

مالك خليفي .. 28 سنة .. من المنيا

" الحول الوحشي المرتجع "

مالك الشاب الشجاع ده خريج نظم معلومات وشغال في شركة IT  في المنيا .. مالك عمل قبل كده عمليتين حول في خلال 5 سنين والحول رجع له تاني

صعب جداً يا جماعة اني اقنع حد عمل عمليتين حول قبل كده والحول رجع له تاني زي مالك كده انه يعمل عملية تالتة وان ممكن عينه تتعدل والحول ميرجعش بعد كده .. كتير من المرضى دول مش بيصدقوني .. انا قلت لمالك بصراحة حقيقة موضوع رجوع الحول ده زي ما انا باكتبه على صفحتي وأكيد كلكم قرأتوه قبل كده ..

" كتب الطب والاحصاءات في مراكز ومستشفيات الحول في العالم كله بتقول الآتي :

1. انواع الحول كتيره جداً .. ييجي 80 نوع

2. الغالبيه العظمى من انواع الحول مش بيرجع لها الحول ابداً بعد العمليه .. يعني اللي عنده حول من الانواع دي وعمل عمليه حلوه والحول اتعدل .. يستحيل الحول يرجع له تاني ويعيش زي مايعيش ويكمل حياته وهو زي الفل

2. انواع الحول التانيه اللي ممكن الحول يرجع لها تاني بعد العمليه مش كتيره .. ولازم الدكتور يقول للمريض النسبه المئويه لرجوع الحول حسب نوع الحول اللي عند المريض .. فيه حول بيرجع بنسبة 1% بس .. وفيه حول بيرجع بنسبة 10% .. ودي اكبر نسبه معروفه للحول المرتجع

3. نسبة الرجوع 10% يعني ايه ؟ .. يعني كل 100 مريض عندهم الحول ده ونعمل لهم العمليه والحول يتعدل .. 90 مريض ميرجعش الحول عندهم ابداً .. و10 مرضى بس هما اللي بيرجع لهم الحول .. وده بنسميه الحول المرتجع .. وال 10% دول هما اللي كل اسبوع يخشوا صفحتي ويخوفوا الناس من العمليه ويقولوا للناس اوعوا تصدقوا الكلام ده .. اوعوا تعملوا العمليه .. احنا عملنا العمليه والحول رجع تاني

4. ملحوظه - لما مريض يعمل عمليه والحول ميتعدلش بالعمليه .. ده مش اسمه حول مرتجع .. ده اسمه عمليه مش ناجحه ولازم تتعمل تاني .. حول مرتجع يعني العمليه نجحت والحول اتعدل وبعدين بعد فتره الحول رجع تاني

5. طيب الحول المرتجع بيرجع بعد العمليه بأد ايه ؟ .. في الحقيقه مفيش قاعده ثابته .. ساعات الحول يرجع بعد العمليه بكام شهر وساعات يرجع بعد العمليه بكام سنه

6. طيب اللي طلع حظه وحش وكان من ال 10% دول والحول رجع له .. يعمل ايه .. يعمل حاجه من اتنين .. يا اما يقعد في البيت زعلان ومحبط ويائس ومكسوف ويدخل كل اسبوع على صفحتي يحذر الناس من العمليه .. يا اما يكون ذكي وشجاع وميرضاش يكمل حياته كده ويصر يعمل عمليه تاني عشان يعدل الحول

7. طيب اللي عنده حول مرتجع وعمل عمليه تاني هل ممكن الحول يرجع له تاني بعد فتره ؟ .. برضه بنسبة 10% .. يعني كل 10 مرضى عندهم حول مرتجع 9 منهم الحول يتعدل وميرجعش تاني ابدا ومريض واحد يرجع له الحول .. والمريض ده يا اما يخش صفحتي تاني يسب ويلعن في عمليات الحول .. يا اما يعمل عمليه تالته .. وربنا يكرمه بإذن الله "

مالك كان شجاع واقتنع بكلامي وتوكل على الله وعملت له العملية من اسبوعين كده  .. دي صورته بعد العملية .. النتيجة هايلة جداً الحمد لله .. ولسه كمان لما الاحمرار ده يروح .. وإن شاء الله ميرجعش الحول تاني أبداً

شكراً  يا مالك انك وافقت ننزل صورك على صفحتي

وحمد الله على سلامتك .. وربنا يوفقك يا ابني