حالة هذا الاسبوع ( 414 )

مدام كريمة .. 42 سنة .. من سوهاج

" الحول الوحشي للعين الضعيفة "

مدام كريمة .. الست السكر دي .. صعيدية من سوهاج .. عندها الحول ده من صغرها .. زمان باباها ومامتها راحوا بيها لكذا دكتور وكلهم قالوا لهم نفس العلاج .. الحول ده ملهوش علاج إلا العملية .. وكالعادة .. زي مابيحصل كتير في الصعيد .. رفضوا يعملوا لها العملية .. وسابوها يا عيني تعيش كده .. خلصت الثانوية كده .. ودخلت الجامعة كده .. واتعينت موظفة وهي كده .. واشتغلت واتجوزت وخلفت وهي كده .. المهم .. بدأت مشكلتها الحقيقية تظهر مع الحول لما ولادها كبروا شوية .. وبدأ أصحابهم يتنمروا عليهم بسبب عين مامتهم .. كل شوية بناتها ييجوا يعيطوا ويقولوا لها .. البنات بيتنمروا على عينيكي يا ماما

.. عندها بس كريمة قررت تجيلي وتعمل العملية

كريمة جت لي العيادة مع خالها من حوالي شهرين .. قالت لي انها متابعة صفحتي وبتشوف الحالات اللي بانزلها على الصفحة .. وان نفسها تشوف صورتها على الصفحة زي القمرات اللي بانزلهم بعد العملية .. وانها عارفة انها اتأخرت وكده .. بس مش مهم .. المهم انها أخدت القرار خلاص

تاني يوم عملت لكريمة العملية وخرجت من المستشفى ورجعت سوهاج على طول

بعد شهر من العملية كريمة بعتت لي على الواتس صورة جميلة دي وكلام جميل جداً كتبتهولي .. جت لي العيادة بعد شهرين تسلم عليا وتشكرني .. وجابت لي معاها هدية صعيدية ملهاش حل

كل مرة يا جماعة تجيلي واحدة في سن كريمة وأتفاجئ بعد العملية إنها زي القمر كده بأكره المرض ده أكتر

الحول مش بيأثر على شكل الإنسان بس .. بيأثر أكتر على نفسيته .. على طبيعته .. على شخصيته .. على تصرفاته .. على شغله .. على علاقته بالناس

أنا بأشوف المرضى دول قبل وبعد العملية .. طبعا حاجه غير .. ضحكة إيه .. وفرحة أيه .. وثقة إيه .. كريمة اتغيرت فعلاً .. بقت واحدة تانية والله

حمد الله على سلامتك يا ست الكل .. وألف مبروك نجاح عمليتك