حالة هذا الاسبوع ( 152 ) راوية .. 18 سنة من قنا

" الحول الرأسي "

راوية عندها حول رأسي في العين اليمين من وهي صغيرة .. في الحول الرأسي بتكون عين أعلى من عين .. والوضع ده طبعاً بيأثر على شكل العيان .. الحول ده نادر مش بنشوفه كتير وملهوش علاج الا العملية .. بس قبل العملية يا جماعة .. مهم جداً التشخيص ..  العضلات المسئولة عن الحول ده 4 عضلات مختلفة وبنحتاج اجهزة معينة وفحص دقيق عشان نوصل لسبب الحول وبالتالي نوصل للعملية المطلوبة .. ازاي عين مرفوعة بالمنظر ده نقدر ننزلها لتحت بأجزاء من الملليمتر من غير مشاكل .. ازاي ننزلها لنفس المستوى الافقي بتاع العين التانية بالظبط .. لو فرقت نص مللم هتبقى برضه عين أعلى أو أوطى من التانية ..

المهم .. عملت لراوية رسم عضلات .. وحددنا العضلات المسئولة عن ارتفاع العين اليمين لفوق كده .. حددنا زاوية ارتفاعها .. وحددنا العملية اللي المفروض نعملها عشان ننزل العين لتحت ..

اتفقنا نعمل العملية تاني يوم .. يا مسهل يارب

راوية جت لي النهاردة عشان اطمن عليها بعد اسبوعين من العملية.. الحمد لله .. هايلة والله .. نتيجة رائعة .. يستاهل الحمد .. عمليتك حلوة قوي يا راوية .. عايز انزلها على صفحتي في حالة هذا الاسبوع .. قالت لي بس تعمل كروب للصورة عشان محدش يعرفني ..

حمد الله على سلامتك يا بنتي

والف مبروك

د. جمـال صبحي