|
حالة هذا الاسبوع ( 281 ) أسامة الشعبي .. 37 سنة .. من
السعودية
" الحول الرأسي "
( الأول أحب أشكر أستاذ أسامة لأنه وافق إني أنزل صوره على
صفحتي )
-------------
من سنة ونص أسامة بعت لي صورته دي على المسنجر وبيسألني
عينه بتطلع لفوق كده من صغره والدكاترة قالوا علاجها عملية
.. هو خايف يعملها وبيسألني هل الحول ده عمليته سهلة بتجيب
نتيجة وناجحة ولا لأ ؟
وده كان ردي :
أهم حاجة يا أسامة في الحول الرأسي هو التشخيص الصحيح ..
لأن العضلات
المسئولة عن الحول ده 8 عضلات مختلفة في العينين .. فلازم
نحدد العضلة المسئولة عن ظهور الحول عشان نحدد نوع العملية
إللي هتعدل العين
الموضوع في منتهى الحساسية .. ازاي عين مرفوعة بالمنظر ده
نقدر ننزلها لتحت بأجزاء من الملليمتر .. ازاي نحافظ على
الجفن العلوي أثناء العملية من غير ما ينزل مننا لتحت
ويعمل لنا مشكلة جديدة .. ازاي نقدر ننزل العين العالية
لنفس المستوى الافقي بتاع العين التانية بالظبط .. لو فرقت
نص مللم هتبقى برضه عين أعلى أو أوطى من العين التانية
ونرجع لنفس المشكلة
المهم يا أسامة ألخص لك إجابتي بكلمة واحدة .. " التشخيص
أولاً "
--------------
بعد الرسالة دي بأسبوعين ظهر وباء الكورونا في العالم
وتوقفت رحلات الطيران بين مصر والسعودية .. وتوقف التواصل
بيني وبين أسامة لمدة سنة ونص
----------------
الأسبوع الماضي فوجئت ب أسامة داخل عليا العيادة ..
افتكرنا الموضوع وفتحنا الماسنجر وقرأنا الرسايل القديمة
بتاعتنا وقعدنا نضحك سوا
المهم .. كشفت على أسامة وحددت العضلة المسئولة عن الحول
واتفقنا نعمل العملية تاني يوم عشان ظروف سفره وكده
-----------
أسامة جاني النهاردة بعد العملية بيومين .. الحمد لله رب
العالمين .. نتيجة العملية حلوة جداً .. زي مانتم شايفين
في الصورة
ألف حمد الله على السلامة .. وشكراً تاني انك وافقت تنزل
صورك على صفحتي
|
.jpg)
