الحول الكاذب 1

حالة هذا الاسبوع

" الحول الكاذب "

" بنتك ماعندهاش حول يا مدام "

الجملة دي قلتها كتير قوي .. والحالات دي يا جماعة بتتكرر عندي كتير قوي .. نفس الحوار بالظبط هو هو كل يوم مع كتير من الامهات

-       اهلا وسهلا .. خير يافندم

-       بنتي يا دكتور جمال عندها 10 شهور .. عندها حول من ساعة ما اِتولدت .. وديتها لكذا دكتور .. كلهم قالوا لي نفس الكلام " بنتك ماعندهاش حول يا مدام " .. قلت آجي لحضرتك .. قالوا لي ان حضرتك هتقولي ازاي يعني ماعندهاش حول .. ده كل الناس بيقولوا لي بنتك حولة .. كل قرايبي وجيراني بيقولوا لي بنتك حولة .. انا نفسي شايفاها حولة ..

اقوم عشان اكشف على البنت .. بصراحة يا جماعة البنت فعلاً شكلها أحول .. أمها عندها حق والله .. ازاي دي ماعندهاش حول ؟؟ ... بعد ماافحص الجهاز الحركي للعين وقاع العين واختبارات تمركز العين ودرجة الابصار لكل عين .. وحاجات كده .. اكتشف فعلاً ان البنت سليمة زي الفل مافيهاش حاجة.

-       بنتك فعلاً يا مدام زي الفل .. ماعندهاش حاجة والله .. ده اسمه يافندم " الحول الكاذب " أو " الحول الظاهري "

- اشرح لحضرتك بقى ايه هو " الحول الكاذب "

فيه حاجات كتيرة يا جماعة تخلي البيبي شكله أحول لكن هو في الحقيقة بيكون سليم خالص .. شكل الوش مثلاً .. شكل العين نفسها .. الجبهة .. الانف .. الجفون .. الخ ..

يعني مثلاً لما يكون الانف من فوق عريض شوية نلاقي العين لما تبص للجنب بتستخبى ويبان الطفل كأنه أحول .. وهو مش كده

ومثلاً لما تكون العين مايلة شوية .. والجفون نازلة من الجنب شوية .. زي العيال الصينيين كده .. تبصي للطفل تفتكريه أحول .. وهو طبيعي خالص

ومثلاً لما تكون المسافة بين العينين صغيرة قوي .. أو حتى كبيرة قوي .. بتدي انطباع ان البنت حولة .. وهي في الحقيقة ماعندهاش أي حول

يعني حاجات كتيرة قوي بتكون السبب في الشكل الغريب ده .. ده بنسميه حول ظاهري .. يعني مش حول بجد .. عشان كده بنسميه برضه " الحول الكاذب "

طبعاً يا مدام احنا بنقدر نعرف بسهولة عن طريق الفحص بالأجهزة المختلفة اللي عندنا اذا كان فيه حول ولا لأ .. الأجهزة دي مالهاش دعوة بشكل البيبي .. ليها دعوة بس بقياس التوافق الحركي للعينين .. تحديد النقطة المركزية للعينين .. حاجات كده يعني بنقدر نحسم بيها الموضوع ونعرف فيه حول ولا مفيش ..

-       طيب يا دكتور جمال عرفنا ان ده حول كاذب .. هتسيب البنت شكلها أحول كده .. مش هتعملها أي حاجة يعني

-       والله يا مدام طبعاً مش هنعملها أي حاجة .. باقول لحضرتك بنتك سليمة .. ازاي اعملها عملية وهي ماعندهاش حاجة

الولاد دول ياجماعة علاجهم الوقت .. كام سنة كده .. هيكبروا شوية .. راسهم الصغيرة دي هتكبر .. عينيهم كمان هتكبر وهتبعد عن بعض شوية .. الجفون اللي داخلة على العين دي هتبعد هي كمان شوية بشوية .. يعني كل الاسباب اللي خلت شكلهم أحول هتختفي شوية بشوية كل ما يكبروا .. ونلاقي في الآخر شكلهم بقى طبيعي خالص ..

-       الف سلامة عليها يافندم .. الحمد لله رب العالمين .. البنت زي الفل ..

وأخيرأ تلاقيني باقول نفس الجملة:

" بنتك ماعندهاش حول يامدام "

د. جمـــال صبـــحي