كتير من الاطفال اللي عندهم طول نظر بيحصل لهم حول انسي .. يعني عينيهم تنحرف للداخل

الولاد دول 3 انواع .. شوف حالتك من النوع الأول ولا من النوع التاني ولا من النوع التالت عشان تعرف طريقة العلاج:

1. النوع الأول : لما الطفل يلبس نضارة عشان طول النظر اللي عنده نلاقي الحول اختفى تماماً .. ولما يقلع النضارة الحول يظهر .. يبقى خلاص الطفل ده علاجه نضارة مش عمليه .. وكل 6 شهور نشوف مقاس النضارة اتغير ولا لأ .. معظمهم نلاقي كل شويه طول النظر بيقل عن الأول .. ويفضل يقل شويه بشويه لحد ميبقاش عنده طول نظر خالص ويستغنى عن النضارة وطبعاً ساعتها مايبقاش فيه حول .. الولاد دول

بيستغنوا عن النضاره على سن 10 أو 12 سنه بالكتير.

2. النوع التاني: برضه لما الطفل يلبس نضارة نلاقي الحول اختفى تماماً .. ولما يقلع النضارة الحول يظهر .. لكن لما بنشوفه كل 6 شهور نلاقي طول النظر مش بيقل ولا حاجه .. يعني هيفضل يلبس النضاره على طول عشان الحول مايظهرش .. الولاد دول اللي كبروا وطول النظر اللي عملهم حول لسه موجود بنعمل لهم ليزك أو تصحيح ابصار على سن 18 سنه مش قبل كده .. لأن ممنوع طبياً منعاً باتاً عمل ليزك قبل سن 18 سنه لخطورته على عيون الأطفال.

3. النوع التالت: لما الطفل يلبس النضاره نلاقي الحول لسه موجود .. أو نلاقي الحول قل شويه بس لسه موجود .. ده علاجه عملية حول .. بس برضه هيلبس النضاره عشان طول النظر .. زيه زي أي حد عنده طول نظر ومحتاج نضاره عشان يشوف كويس.