فيه وهم شايع عند عيانين الحول بيخليهم ميعملوش العمليه ويفضلوا طول عمرهم عايشين بالحول ده .. الناس بتقول لهم اوعى تعملوا العملية .. اي حد بيعمل عملية حول .. بعد شوية الحول بيرجع تاني

الكلام ده طبعا مش صح .. ده كلام غلط خالص ومخالف لكل الحقائق الطبيه المعروفة .. نسبة رجوع الحول بعد العملية ١٠% بس .. ومش في كل أنواع الحول كمان .. فيه أنواع كتيره من الحول مش بترجع ابدا .. رجوع الحول تاني بعد العملية بيكون غالبا في انواع الحول اللي فيها بتكون العين الحوله ضعيفة وكسلانة .. وحتى الأنواع دي اللي نسبة الرجوع فيها ١٠% .. دي نسبة قليلة أوي .. يعني كل ١٠ عيانين بيعملوا العملية تسعة منهم مش بيرجع لهم الحول ابدا.. وعيان واحد بس من العشرة بيرجع له الحول بعد سنه سنتين تلاته اربعه .. المهم العيان ده لما بيرجع له الحول بنعمل له عمليه تاني والحول بيتعدل برضه .. يعني مش كارثة قومية ان الحول يرجع .. خالص .. الموضوع بسيط جدا .. بنشد العضله كمان شوية والحول بيتعدل ويكمل حياته زي الفل